পৰিবৰ্তন

 "ল'ৰাটোৱে দিনটো ঘুৰি ঘুৰি একো সফলতা প্ৰাপ্ত কৰিব নোৱাৰাৰ পিছত আমাৰ ব্যৱসায়িক কাৰ্যালয়ত উপস্থিত হ'লহি। মই তেওঁক মাতি দিনটোৰ কামৰ খটিয়ান ল'লো। সি ক'ত ক'ত গ'ল, কোনে কি ক'লে সেইবোৰৰ বাদে কামৰ নামত একো সদুত্তৰ দিব নোৱাৰাত যোৱা মাহটোৰ খটিয়ান বিচাৰিলো। সেয়া চাই অনুভৱ হ'ল যে তাক দৰমহা দি, ঘুৰিবৰ বাবে তেলৰ প‌ইচা দি এক অপচয় কৰি থকাহে হৈছে। তৎক্ষণাৎ তাক কৰ্মৰ পৰা অব্যাহতি দি হিচাপটো তৈয়াৰ কৰিবলৈ হিচাপ ৰক্ষক জনক আদেশ দিলোঁ।" এয়া অতি নম্ৰ ভদ্ৰ অতি পুৰণি ব্যৱসায়িক প্ৰতিষ্ঠানৰ দায়িত্বত থকা ৬৫ -ৰ উৰ্ধৰ ব্যক্তি এজনৰ মুখৰ কথা আছিল। কিবা অলপ কিনিবলৈ গৈ তেওঁৰ তাত বহিছিলোঁ গৈ। পিছে কথাখিনি শুনি ম‌ই তেওঁক নোকোৱাকৈ নোৱাৰি ক'লো -" #ভাইজী, সময়ৰ তাগিদাত হয়তো আমি সকলোৱেই #নিধক হ'বলৈ শিকিব‌ই লাগিব এতিয়া। কাৰণ পৰিস্থিতিৰ আমি দাস। এতিয়া হয়তো ৯০ শতাংশ মানুহৰেই #জৱানৰ মূল্য নোহোৱা হৈছে। দহ শতাংশৰ ভিতৰৰে একাংশ সুৰক্ষিত চাকৰীত কামকৰি থকা নিশ্চিত উপাৰ্জন কৰা লোক হয়তো ওলাব, যি মিতব্যয়ী হৈ থকাৰ সুবাদতে নিজকে এতিয়ালৈকে #জৱান_কা_পক্কা কৰি চলি আছে। লাহ-বিলাহৰ জীৱন আৰু জৱান-কা-পক্কা দুয়োটা বৰ্তাই ৰখাটো তেওঁলোকৰ বাবেও এতিয়া অসম্ভৱ। ঈশ্বৰৰ ইচ্ছাত সকলো ঠিক চলি থকা লৈকে সেই সকলৰ পৰা অসুবিধা নেপাব। ল'ৰাটোক কামৰ পৰা বিদায় দি হয়তো আপোনাৰ বাণিজ্যিক লাভ একো নহ'ব!! সমগ্ৰ মানুহৰ মাজত এতিয়া প্ৰচণ্ড অভাৱৰ জোৱাৰ উঠিছে। সেই জোৱাৰত সৰ্বাধিক ক্ষতি আপোনাৰ বা আপোনালোকৰ দৰে ব্যৱসায়িক গোষ্ঠীৰ মানুহৰ। কেউফালে কেৱল নাই আৰু নাই। আছে কেৱল আপোনাৰ মোৰ দৰে অফুৰন্ত সময়...! কাৰণ ব্যস্ততাৰ লাহে লাহে অভাৱ হ'ব ধৰিছে...!!"

মোৰ কথা শুনি মানুহ জন উঠি আহি মোক সাৱটি ধৰিলে। চকু তেনেই সেমেকা। তেওঁ মোক ক'লে-"মই এই প্ৰতিষ্ঠানত ৫০ বছৰ আছোঁ। এনেকুৱা দিন কেতিয়াও দেখা নাছিলোঁ। এতিয়া ঠাকুৰবাৰীৰ মন্দিৰত গৈ সেৱা কৰি পাঁচ টকা দিলে এক চলু পানী আৰু তুলসী পাত এটা যে দিয়ে সেয়েই য়েনেকৈ সৰ্বোচ্চ সম্পদ বুলি সাদৰেৰে ল‌ও‍ঁ, এতিয়াৰ ব্যৱসায়ত কোনোবাই কেতিয়াবা নগদ কিবা যদি কিনে, সেয়াও তেনেকুৱা যেনেই লাগে। আমাৰ মালিকে কৈ থাকে , তুমি যেতিয়াই এৰি যাবাগৈ তেতিয়াই এই ব্যৱসায়িক প্ৰতিষ্ঠান বন্ধ কৰি দিম। মানৱীয়তাৰ খাতিৰতহে সেই দিনটো লৈকে তোমালোকক চলাই আছো বা পৰালৈকে থাকিম ...!!!"

উত্তৰত তেওঁক কি ক'ম ভাবি নেপাই পিঠিত হাত ফুৰাই বিদায় ল'লো তেওঁৰ পৰা। আহোঁতে কেৱল কৈ আহিলো - " ভাইজী, আপুনি বিদায় দিয়া ল'ৰাটো সজ আৰু নম্ৰ বাবেই সি আপোনাক কাম জাৰি দিব নোৱাৰিলে চাগৈ। শুকান পুখুৰীত ক'ত মাছ ধৰিবনো সি? আপুনি তাৰ ঠাইত নিজেই কাৰোবাক তাকাদা কৰি শিৰ নতমস্তক নকৰিব কিন্তু দেই। আপোনাৰ সেই পৰিশ্ৰমে আপোনাক আপোনাৰ বিফলতাৰ বাবে লজ্জিতহে কৰিব....!!! এয়া সময়ৰ পৰিবৰ্তনৰ বাস্তৱ ছবি। সকলোৱে নাভিত হাত থৈ বিভিন্ন চলাহি কথাৰে এটা এটা দিন কেনেবাকৈ পাৰ কৰি আছে, তাতকৈ একো নাই....! আমি আমাৰ ভৱিষ্যতৰ প্ৰজন্মক এতিয়াৰ পৰা ভাল ডেলিভাৰী বয় হ'বলৈ প্ৰশিক্ষণ দিব লাগিব ..., থকালৈকে সদায় ভালে থাকক দিয়ক, নমস্কাৰ...."